Hvað er Anarkismi? Útgáfa Bókasafn Dreifing Hafa Samband
Fréttir / Uppfærslur Greinar Bækur um Anarkisma TenglarMyndir

 

 

TERTUKAST (AÐ BAKA VANDRÆÐI)

 

Innihald:

Skotmark sem hefur unnið sér inn fyrir sendingunni.

Terta

Tertukastari

Mögulegar viðbætur væru félagar sem sjá til þess að athygli öryggisvarða beinist annað í örlitla stund, vitni og ljósmyndarar og bílstjóri.

 

Leiðbeiningar: Að kasta rjómatertu í háttsettan einstakling afhjúpar og grefur undan valdakerfum samfélagsins með því að sýna fram á að þekkt andlit og valdamiklir einstaklingar er alls ekki ósnertanlegir og alveg jafn kjánalegir og fólk almennt getur verið.

 

Veldu þér skotmark sem hefur unnið sér inn fyrir sendingunni. Það getur verið formaður stórfyrirtækis eða æðsti maður stofnunar, ráðherra, frambjóðandi, talsmaður samtaka eða önnur fjölmiðlafígúra. Allar þessar fígúrur hafa orðið fyrir barðinu á tertuterroristum við ýmsar aðstæður og með góðum árangri. Minna áberandi einstaklingar sem samt eru fulltrúar félagslegra afla sem álíta sig merkilegri en þeim er hollt, hafa einnig verið teknir í bakaríið t.d. fjölmiðlamenn í beinni útsendingu.

 

Svo er það spurningin um hvar og hvenær. Að slá til þegar skotmarkið stendur á sviði og er að halda ræðu fyrir fjölda manns og fjölmiðla hefur mest áhrif. Um leið eru þá mestar líkur á að kastarinn náist og ef hann vill ekki taka sénsinn á handtöku og kæru má reyna að komast að skotmarkinu einhversstaðar á leiðinni frá bílnum og að rauða dreglinum. Og taka síðan til fótanna. Hafðu augun hjá þér til að finna hið fullkomna augnablik, það birtist fyrr eða síðar. Þegar þú metur hættuna fyrir þig sjálfa/n útfrá möguleikunum sem þú hefur á að láta aðgerðina heppnast vel, skaltu ekki endilega búast við réttlátri meðferð. Láttu samt ekki lögregluríkið halda aftur af þér.

 

Til að komast inn á móttökur hinna háttsettu, valdamiklu og auðugu þarf auðvitað að gæta að útlitinu. Það labbar enginn inn í þannig aðstæður með grænan hanakamb og hring í nefinu. Vertu klædd/ur eins og þú sért á uppleið hjá fjármálastofnun eða sendiráði. Enn mikilvægara en ytra útlit er útgeislunin. Þú þarft að nálgast aðstæðurnar eins og hlutverk þitt þarna sé afar mikilvægt, ekki eins og þú hafir villst inn.

Blaðamannafundir eru ekki jafn uppstrílaðir en þar geta  falsaðir blaðamannapassar verið nauðsynlegir til að komast inn.

Hvað tertuna varðar þá geturðu borið hana í skjalatösku, íþróttatösku eða einhverri sérstakri pakkningu innan undir jakka eða frakka. Á blaðamannfundi geturðu verið með flotta ljósmyndaratösku en úti á götu falið tertuna í kassa undan pizzu.

Tertulagið fer eftir því hvernig hægt er að koma henni á staðinn. Reynsluboltarnir í Bigotic Baking Brigade nota þeyttan rjóma á pappadiski hvenær sem þeir koma því við. Þeyttur rjómi skapar dramatíska klessu og pappadiskar meiða engan. Ef skotmarkið er hinsvegar umkringt öryggisvörðum geturðu ekki verið að sprauta rjóma á disk á ögurstundu. Terta sem þú getur haldið til hliðar þar til á síðustu stundu á þar betur við. Íslenskar skyrtertur eru vísar til að klessast skemmtilega.

 

Það er spurning hvort betra sé að kasta tertunni eða slá henni framan í skotmarkið. Það er alltaf hætta á að hitta ekki þegar maður kastar en á móti er stundum erfitt að komast alveg að fólki. Æfðu þig heima í tertukasti. Ekki gera neitt sem gæti líkamlega skaðað skotmarkið. Ef skotmarkið er með gleraugu er allt í lagi að skella hvaða tertu sem er beint framan í hann eða hana. Þeyttan rjóma og annað mjúkt er saklaust að fá framan í sig, í öðrum tilfellum skaltu forðast augnsvæðið. Athugaðu að sumt fólk getur verið með ofnæmi fyrir innihaldi tertunnar og að sumar fyllingar geta litið út eins og blóð framan í einhverjum svo láttu þær eiga sig nema það sé útlitið sem þú sækist eftir.

 

Ef um er að ræða vopnaða öryggisverði reyndu að láta það vera greinilegt að eina vopn þitt er terta, engar of snöggar hreyfingar! Þú verður að halda í óvænta augnablikið án þess að fá í þig kúlnaregn frá taugaveikluðum byssumanni.

Ekki skemmir að skila kveðju til skotmarksins með tertunni, gefa honum einhver viðeigandi skilaboð.

 

Fleiri en einn tertuterroristi á staðnum tryggja frekar að a.m.k. einn nái árangri. Ef einhver uppákoma dregur athygli viðstaddra að einum punkti getur einn tertukastari náð góðum árangri annars staðar frá. Ef ekki er vitað nákvæmlega hvar skotmarkið muni koma fram geta margir þriggja manna hópar dreift sér svo að einn þeirra nái sem bestum árangri.

 

Fyndin ljósmynd af atburðinum og hnyttilega orðuð fréttatilkynning mun gera heilmikið til að bæta við aðgerðina, hvort sem markmiðið var að koma skilaboðum til almennra fjölmiðla eða hvetja skoðanabræður og –systur til dáða. Þessvegna getur verið mikilvægt að hafa eigin ljósmyndara á staðnum. Ef virkilega næst að koma á óvart verður það kannski einungis þinn eigin ljósmyndari sem nær mynd, nema tertukastið komi inn í miðja ljósmyndarasyrpu atvinnumanna. Samhliða fréttatilkynningunni skaltu vera með ástæðurnar fyrir tertukastinu klárlega útlistaðar til að svara spurningum.

 

Athugið að allt sem skrifað hefur verið um tertur hér fyrir ofan getur líka átt við skyr.

 

Til baka í greinar