Swift Winds
Ron Sakolsky
Eberhardt Press 2009
Undirritaður bókaormur varð nýverið var við litla
bókaútgáfu sem heitir Eberhardt Press. Mæli með því að unnendur fagurbókmennta
í formi róttækra texta og fallegs prentverks leiti hana uppi á internetinu.
„Swift Winds“ er smágert og fallega prentað safn
greina, frásagna, ljóða og hugleiðinga eftir anarkistann Ron Sakolsky. Sakolsky
er súrrealismatengsl anarkismans hugleikin og önnur uppbrot hinna kúgandi hversdagslegu
hefða, óformleg form stjórnvaldsleysis, lífsstíll og listir. Hann er víðlesinn
en um leið enginn fræðimaður, stíll hans skemmtilegur og lifandi, hann
gagnrýnir hrokalaust sem er afar jákvæður hæfileiki.
Hann ræðst af súrrealískri rökfestu gegn eymdinni
í „why misery loves company“, segir af hrifningu frá sjóræningjum í „lost
utopias“, krefst hins ómögulega í framsetningu súrrealísks manifestó og fræðir
lesandann endalaust og kitlar stöðuga leit bókaormsins að nýjum og sláandi hugmyndum
m.a. í umfjöllun um og útfrá bók Allan‘s Antliff –„Anarchy and Art; from the
Paris Commune to the Berlin Wall. Sakolsky segir skemmtilega frá öllum þeim
undarlega listafólki sem akademíkerinn Antliff horfði framhjá í umfjöllun sinni
þannig að gagnrýnin verður afar fróðleg og skemmtileg.
Þetta er það fyrsta sem ég les eftir kallinn og ég
varð spenntur að kynna mér hugmyndir hans frekar. Nokkur ljóð eru í bókinni en
þau töluðu ekki til mín.
Bókin er myndskreytt af Anais Larue – draumkenndir
óraunveruleikafuglar skáskjóta á lesandann augunum milli kafla.
SH
